Festivalarnir fáa hjálparpakka í heyst

Tónleikafestivalar, sum avlýstu í summar, kunnu vænta at fáa ein hjálparpakka í heyst.

Jenis av Rana, landsstýrismaður í mentamálum, sigur í svari til Beintu Løwe, løgtingskvinnu, at í løtuni verður eitt lógaruppskot fyrireikað, og tað verður eftir ætlan lagt fyri tingið í næstum.

Stuðulin skal vera á leið tann sami, sum varð latin í fjør.

Tá fingu tónleikafestivalar stuðul til at endurrinda øll atgongumerki, sum festivalurin hevði selt.

Stuðulin kann tó í mesta lagi verða 85 prosent av útreiðslunum í sambandi við at fyrireika festival í ár, sigur Jenis av Rana í svarinum til Beintu Løwe.