Kappróðurin á sundalagsstevnuni avlýstur

Kappróðurin, sum skuldi verða á sundalagsstevnuni um vikuskiftið, er avlýstur.

Tað skrivar Kollafjarðar ítróttarfelag á facebook í kvøld.

Orsøkin er, at tvíkiljurnar hjá Bakkafrosti, sum vanliga halda startinum, ikki eru tøkar leygardagin.

KÍF skrivar, at arbeitt hevur verið við øðrum loysnum síðan sunnukvøldið, men stutta skotbráið og nógvi trafikkurin á fjørðinum ger, at tað ikki hevur borið til at roynt aðrar loysnir í verki.

 - Vit í kappróðrarnevndini hava verið á fundi við RFS í kvøld og tosað um íkomnu støðuna. Øll vóru samd um, at tað, at royna eina nýggja og óroynda loysn, sum møguliga ikki riggar, ikki er rætti vegurin at fara, skrivar KÍF á facebook. 

 - Vit hugsa fyrst og fremst um rógvaran og at geva teimum bestu uppliving, sum til ber, á róðrardegnum. Vit eru hørm um støðuna, men vóna at øll skilja, at hetta er frægasta avgerð, skrivar KÍF.

Róðrarsamband Føroya arbeiðir við at flyta róðurin, og kunnað verður um tað seinni, verður lagt afturat á facebook-vanganum hjá Kollafjarðar ítróttarfelag.