- Tíðindi, mentan og ítróttur
Hava andevni móti COVID-19 í eitt ár
Føroyingar, sum hava havt koronu, hava andevni móti COVID-19, sum halda sær upp í 12 mánaðir. Gransking vísir, at meira enn 95 prosent av teimum kannaðu hava andevni móti koronu eftir smittu.
– Serliga áhugavert er, at andevni framvegis kunnu mátast hjá teimum upp í 12 mánaðir eftir sjúkuna, sigur Maria Skaalum Petersen, lektari og senior-granskari.
Tær kanningar, sum higartil eru almannakunngjørdar, siga, at andevni halda minst í átta mánaðir.
Týðandi úrslit
– Men hetta er fyrstu ferð, at vit kunnu prógva, at koronusjúklingar framvegis hava andevni móti koronu eitt ár eftir, at tey hava verið sjúk, sigur Maria Skaalum Petersen, sum heldur, at talan er um sera týðandi og góð úrslit.
Peter Garred, professari á universitetinum í Keypmannahavn og yvirlækni á Ríkissjúkrahúsinum, hevur verið við í føroysku granskingini. Hann er samdur við Mariu Skaalum Petersen um týdningin, granskingúrslitini hava.
– Tey benda á, at størsti partur teirra, sum hava havt Covid-19, eru heilt ella lutvíst mótstøðufør fyri nýggjari smittu í upp í eitt ár eftir smittu, í øllum førum við sama virusvarianti, sigur hann.
Blóðroyndir hjá 405 føroyingum, sum høvdu koronu frá mars til desember í fjør, eru brúktar í granskingini.