Væl bjálvaðar fyritøkur hava bjargað búskapinum

Bæði fyritøkur og húsarhald í Føroyum eru væl bjálvað, og hava verið før fyri at standa ímóti búskaparliga stoytinum, í kjalarvørrinum av koronufarsóttini.

Tað sigur danski tjóðbankin í niðurstøðuni í einari greining av føroyska búskapinum. 

Korona hevur skert búskaparliga virksemið, men føroyska strategiin at byrgja smittuna inni, hevur eydnast væl. Ti hevur ikki verið tørvur á varandi og strongum tiltøkum, sigur tjóðbankin.

Altjóða afturstigið og óvissan um framtíðina hevur havt ávirkan á fiskaprísin, men alifyrtiøkurnar og fiskivinnan hava klárað at laga seg til broyttu umstøðurnar, og eru farin frá at selja til matstovukundar til smásølu í staðin. 

Fyritøkurnar hava eisini verið førar fyri at gera nýíløgur, tí tær vóru væl bjálvaðar, áðrenn korona fór at ganga.

Tað hevur bjargað búskapinum, sigur tjóðbankin í niðurstøðuni.

Endurgjaldið havt týdning

Endurgjaldið, sum fyritøkurnar hava fingið, hevur eisini havt týdning fyri búskapin. Í byggivinnuni er lønarvøksturin umleið fýra prosent, og tørvur er á arbeiðsmegi. 

Hóast endurgjaldið í sambandi við koronu helt uppat í september, er arbeiðsloysið ikki vaksið, og hóast sveiggini í hesum árinum, er framvegis hákonjunkturur í Føroyum, sigur tjóðbankin.

Altjóða felagsskapir vænta, at lágkonjukturur verður í heimsbúskapinum, og endurreisnin verður bæði ótrygg og drúgv.

Tað ávirkar útltini hjá einum lítlum og opnum búskapi sum tí føroyska, tí keypiorkan úti í heimi minkar, og tað trýstir prísin á útflutningsvørum niður.

Útflutningsfyritøkurnar kunnu tí vænta minni inntøkur næstu árini, og tí hevur føroyski búskapurin helst rakt tindin í hesum umfari, sigur tjóðbankin í greiningini av føroyska búskapinum.