Zacharias Hammer farin

Í morgun bórust tíðindini um, at sjónvarpsmaðurin Zacharias Hammer er deyður, 68 ára gamal. 

Zacharias var ein av undangongumonnunum at gera føroyskt sjónvarp. Hann var útbúgvin lærari, men hansara yrkisleið fór sjónvarpsvegin. Hann virkin í sjónvarpsfelagnum, og kom í starv sum programmedarbeiðari í Sjónvarpi Føroya, tá tað fór at senda í 1984. 

Tey fyrstu árini gjørdi Zacharias barnasendingar. Røðir, sum tær um Gyðju og Grana og ikki minst sendirøðin um Dólgarnar, fingu bæði børn og vaksin at sessast frammanfyri sjónvarpinum.

Seinni fór hann at gera mentanarsendingar, og tær gjørdust eisini sera vælumtóktar. Zacharias hevði sín egna fólksliga stíl, og hann dugdi væl at siga frá gerandislívinum hjá vanliga føroyinginum. Hann legði seg eftir at siga søgur úr øllum Føroyum, eins og hann gjørdi fleiri sjónvarpsrøðir við ferðafrásagnum úr fjarskotnum londum. 

Zacharias var ein dugnaligur fotografur, og tað kom honum til góðar, tá hann gjørdi dokumentarsendingar frá lívinum umborð á føroysku fiskiskipunum, og tá hann var við fjallmonnunum til bjarga.

Zacharias Hammer starvaðist í Sjónvarpi Føroya og síðani í Kringvarpi Føroya frá fyrsta degi í 1984 og fram til 2007. Hann festi ein týðandi part av føroysku mentanini á sjónband. OG Í 2001 fekk Zacharias Hammer virðisløn M.A. Jacobsens fyri serligt mentanaravrik.

Seinnu árini hevur Zacharias Hammer arbeitt sum fólkaskúlalærari á miðlabreyt og sum fríyrkismaður, har hann millum annað eisini hevur gjørt sendingar til Kringvarpið. Nú hann andaðist, hevði hann júst - saman við fólki úr Kringvarpinum - lagt seinastu hond á tríggjar sendingar um fiskiskap við línuskipum undir Føroyum og á Flemish Cap. Hesar sendingarnar verða sendar í heyst. 

Við hesum lýsa vit frið yvir minni um sjónvarpsmannin Zacharias Hammer.