Mette Frederiksen framvegis stóra undirtøku

Hóast andstøðuflokkarnir í fólkatinginum finnast hvassliga at Mette Frederiksen, forsætisráðharra, og sosialdemokratisku stjórn hennara fyri handfaringina av koronakreppuni, tekur veljarin dyggiliga undir við henni.

Ein kanning, sum Ritzau-tíðindastovan hevur latið gera, vísir, at var val nú, hevði stjórnarflokkurin fingið 34,7 prosent av atkvøðunum.

Ein kanning fyri trimum mánaðum síðani vísti, at danski javnaðarflokkurin hevði fingið 26 prosent. Tað var beint undan fyrstu tiltøkunum, sum stjórnin setti í verk í sambandi við koronavirusið.

Hóast danska samfelagið at kalla læt aftur, hevur tað ikki ávirkað umdømdið hjá Mette Frederiksen, tvørturímóti.

62 sessir

Í kanningini, sum Voxmeter hevur gjørt fyri Ritzau, og sum verður kunngjørd í dag, fær sosialdemokratiski stjórnarflokkurin 34,7 prosent av atkvøðunum, og tað hevði givið 62 sessir í fólkatinginum.

Hagfrøðiliga frávikið er 2,9 prosentstig hvønn vegin.

1036 fólk vórðu spurd í kanningini, sum varð gjørd frá 25. mai til í gjár, 31. mai.

Á fólkatingsvalinum fyri einum ári síðani, fingu sosialdemokratarnir 25,9 prosent av atkvøðunum og 48 fólkatingssessir.

Vinstri afturgongd

Nýggja veljarakanningin vísir, at størsti andstøðuflokkurin í fólkatinginum, Vinstri, fær 19,5 prosent og 35 sessir.

Á fólkatingsvalinum í fjør fekk Vinstri 23,4 prosent og 43 fólkatingsessir.

Var val nú, høvdu flokkarnir á reyða veingi fingið tilsamans 106 sessir í fólkatinginum og borgarligu flokkarnir 69 sessir.