Leita nú eftir lodnu

Felagið hjá teimum, sum eru í íslendsku fiskivinnuni, og havrannsóknarstovnurin høvdu fund í gjár. Har varð samtykt, at tvey uppsjóvarskip og havrannsóknarskipið Árni Friðriksson fara at leita mánadagin.

Leitingin hjá uppsjóvarskipunum kostar góðar 3,2 milliónir krónur í okkara pengum. Havrannsóknarstovnurin rindar helvtini av teimum, skrivar Morgunblaðið.

Atfinningar hava verið frá vinnnuni og størstu kommununi á Eysturlandinum nú í vikuni, tí eingin leitar eftir lodnu.

Íslendski statskassin misti nógvan pening

Seinast, leitað varð eftir lodnu, var í oktober í fjør. Tá var eingin lodna at síggja. Í fjør varð eingin lodna fiskað í Íslandi, tí eingin lodna var at fáa. Hetta var fyrstu ferð í hálva øld, at tað hendi.

Hóast okkurt skip leitaði í 75 dagar í fjør, var eingin lodna at finna. Mett verður, at íslendski statskassin misti okkurt um 250 milliónir krónur í fjør, tí eingin lodna var.

Í 2018 útflutti Ísland lodnu fyri slaka milliard krónur í okkara pengum. Føroyingar hava lodnukvotu í íslendskum sjógvi.