Meirilutin hevur útbúgving

Meira enn helvtin av teimum arbeiðsleysu í Føroyum hava okkurt slag av útbúgving.

Tað vísir ein uppteljing, sum ALS hevur gjørt í summar. 59 prosent hava okkurt slag av útbúgving.

Uppteljingin hjá ALS vísir, at 38 prosent hava eina yrkisútbúgving, til dømis í skrivstovu ella í handverki ella styttri útbúgvingar í heilsurøkt. 

Hægri útbúgving

21 prosent hava hægri útbúgving. Lærarar og námsfrøðingar telja við her. Átta prosent hava útbúgving á kandidatstigi ella masterstigi.

32 prosent hava onga útbúgving eftir fólkaskúlan. Níggju prosent hava miðnám sum sína longstu skúlagongd.

Í dag eru 261 fólk skrásett hjá ALS, tí tey einki arbeiði hava, 153 kvinnur og 108 menn.