Venjarin: Í kvøld skal Malta hava trý stig

Vit skulu heilt aftur til 2013 fyri at finna síðsta sigurin hjá Malta í eini undankapping.

Tá vann Malta 2-1 á Armenia á útivølli.

Nakrir javnleikir hava verið síðan tá, men fótbóltsfjepparar í Malta eru svangir eftir einum sigri.

Vit hava hitt venjaran hjá Malta, Ray Farrugia, sum sigur, at í kvøld skal Malta vinna.

- Vit vilja vinna hendan dystin, og vit fara eftir trimum stigum.

-Hetta verður ikki nakar lættur dystur. Føroyar hava eitt gott lið, og vit hava virðing fyri teimum.

-Men eingin skal ivast í, at vit fara á vøllin eftir øllum trimum stigunum í kvøld.

Fara tit at royna stýra dystinum, so tit hava bóltin meira enn Føroyar?

-Ja, tað vilja vit helst. Vit hava nýggjar spælarar í hópinum, sum eru sera bólttryggir, og teir fara at styrkja okkum í tí partinum av spælinum, sigur maltesiski venjarin.

Hugsar ikki um Spania

Næsti dysturin hjá Malta er longu týsdagin, tá teir eru á vitjan hjá sterkasta landinum í bólkinum, Spania.

Men Ray Faruggia hugsar als ikki um tann dystin.

-Fyri okkum er hetta tann stóri dysturin, og hetta er tað einasta vit hugsa um.

-Vit hugsa ikki um Spania, fyrr enn hesin dysturin er spældur, sigur Ray Farrugia við Kringvarpið.

Beinleiðis í sjónvarpinum

Kringvarpið sendir EM-undankappingardystin ímillum Malta og Føroyar beinleiðis í sjónvarpinum.

Dysturin byrjar klokkan 17.00, sjónvarpið byrjar at senda klokkan 16.30