- Tíðindi, mentan og ítróttur
Forsetaval er í Brasil í dag
Seinna umfar av forsetavalinum í Brasil er í dag millum høgravíðgongda politikaran Jair Bolsonaro og Fernando Haddad frá vinstrasinnaða arbeiðaraflokkinum.
Meiningarkanningar vísa, at tað stendur mestsum á jøvnum millum valevnini - tó við lítlari yvirvág til Jair Bolsonaro.
Valstríðið hevur verið merkt av harðskapi.
Jair Bolsonaro var fyri einum álvarsligum álopi við knívi og misti nógv blóð, men kom í síðstu løtu undir skurð og lá á sjúkrahúsi í tríggjar vikur.
Jair Bolsonaro er 63 ára gamal og stillar upp fyri lítla konservativa sosial-liberala flokkin.
Tropiski Trump
Tíðindastovurnar skriva, at Jair Bolsonaro er kendur fyri sínar ágangandi meiningar um fosturtøku og samkynd, fólk við øðrvísi húðaliti og tey, sum av neyð flyta um landamørk. Tað hevur givið Jair Bolsonaro eyknevnið "Tropiski Trump".
Vinstrahalla valevnið, Fernando Haddad, er av libanskum uppruna og hevur verið borgarstjóri í Sao Paulo.
Fernando Haddad gjørdist forsetavalevni ein mánað undan fyrra valumfarinum í staðin fyri Luiz Inácio Lula da Silva, fyrrverandi forseta, ið er dømdur 12 ára fongsul fyri mutur.
Tvær tær seinastu meiningarkanningarnar vóru gjørdar í gjár og vístu, at undirtøkan fyri Fernando Haddad veksur.
Men hildið verður, at Jair Bolsonaro fer at vinna forsetavalið við 55 prosentum av atkvøðunum.
Aftrat forsetavalinum er tjóðartingsval, og allir teir 27 landsparta-ovastarnir í Brasil skulu veljst av nýggjum.