Tjena í miðal 1,8 millión krónur í part um árið

Heilsutrygd rindaði í fjør 53,3 milliónir krónur í lønum til kommunulæknar í føstum starvi og avloysarar í kommunulæknaviðtalum.

Lønin hjá kommunulæknum er sett saman av grundgjaldi, sum er góðar 21.200 krónur um mánaðin. Omaná tað kemur eitt basisgjald, sum er 214 krónur um árið fyri hvønn borgara, sum er tilmeldaður viðtaluna. Eru til dømis 1.500 borgarar í eini viðtalu, gevur tað kommunulæknanum 321.000 krónur um árið í basisgjaldi.

Síðani kemur veitingargjald. Tað er gjald til kommunulæknan, hvørjaferð ein sjúklingur kemur í læknaviðtaluna. 

Og sum tað fjórða fær kommunulæknin samsýning fyri aðrar tænastur, eitt nú, tá løgreglan hevur tørv á tænastum, tá fólk skulu hava bláubók ella líknandi.

Góð ársløn

Sambært yvirliti hjá Heilsutrygd var hægsta útgjaldið til ein kommunulækna í fjør 2,9 milliónir krónur. 

Tað eru 700.000 krónur meira enn tann kommunulæknin, sum fekk næsthægsta útgjaldið frá Heilsutrygd. 

13 kommunulæknar í føstum starvi alt árið í fjør fingu tilsamans 23,3 milliónir krónur í løn frá Heilsutrygd. Tað eru 1,8 millión krónur í part í meðal.

Sambært Heilsutrygd rinda kommunulæknar í føstum starvi sjálvir løn til starvsfólk í teirra viðtalum.
 

Greinin er rættað. Av misgáum stóð skrivað “13 yvirlæknar í føstum starvi...” í næstseinastu reglu. Tað skuldi vera kommunulæknar.