Trump: USA klárar Norðurkorea uttan Kina

USA kann stríðast einsamalt móti Norðurkorea, sigur Donald Trump, amerikanski forsetin, í samrøðu við bretska blaðið, Financial Times.

"Vil Kina ikki loysa hóttanina, sum Norðurkorea er, so mugu vit gera tað"

Orðini verða tikin sum tekin um, at amerikanski forsetin, Donald Trump, leggur trýst á kinesiska forsetan, Xi Jinping, sum fer á vitjan í USA hósdagin og fríggjadagin.

Forboð sett fyri at innflyta kol

- Kina hevur stóra ávirkan á Norðurkorea, og Kina vil hjálpa okkum at loysa ta hóttanina, ella vil landið ikki gera tað. Er tað teirra avgerð, ikki at loysa trupulliekarnar við Norðurkorea, so verður tað ikki gott fyri Kina, men vil landið hjálpa til, so verður tað til fyrimuns fyri Kina, sigur Trump.

Donald Trump hevur fleiri ferðir ávarað ímóti framferðini hjá Norðurkorea, tá talan er um menning av kjarnorkuvápnum. Og hann sigur seg síggja ein vanda í, at Norðurkorea kann menna kjarnorkuvápn, sum kunnu raka mál í USA.

Kina hevur roynt at fáa Norðurkorea at gevast við at menna kjarnorkuvápn, og herfyri setti Kina forboð fyri at innflyta kol úr Norðurkorea. Men sambært Donald Trump er tað ikki nóg mikið.