Stjórin flutt Aliumsitingina aftur til Havnar

Fyrst var tað ein politisk avgerð.

So var tað ein fyristingarlig avgerð. 

Í 2009 gjørdi Johan Dahl, landsstýrismaður í Vinnumálum av, at aliumsitingin hjá Heilsufrøðiligu Starvstovuni skuldi liggja í Suðuroy.

Men nú er politiska avgerðin um at flyta aliumsitingina hjá Heilsufrøðiligu Starvstovuni til Suðuroyar, tikin aftur við eini fyristingarligari avgerð.

Stjórin á Heilsufrøðiligu Starvstovuni, Bárður Enni, hevur fingið loyvi frá sitandi landsstýrismanni í vinnumálum, Poul Michelsen, at flyta Aliumsitingina aftur til Havnar. 

Tað er niðurstøðan eftir eina kæru, sum kringvarpið hevur fingið innlit í.

Kristina Vilhelm, sum hevur starvast á aliumsitingini tey árini umsitingin var í Vági, kærdi um árskiftið, avgerðina hjá Bárði Enni, um at flyta Aliumsitingina til Havnar.

Hon helt ikki, at tað kundi vera rætt, at stjórin á Heilsufrøðiligu Starvstovuni kundi broyta eina politiska avgerð um, hvar aliumsitingin skal vera, stendir í skjølunum, sum kringvarpið hevur fingið innlit í.

Men tað kann hann, er niðurstøðan hjá Uttanríkis- og Vinnumálaráðnum.

Poul Michelsen landsstýrismaður í Vinnumálum heldur, at tað eigur at verða stjórin á Heilsufrøðiligu Starvstovuni, sum ger av, hvar aliumsitingin hjá starvstovuni er, og tað hevur hann boðað Bárði Enni frá í sambandi við flytingina.

"Avgerðin um at flyta staðsetingina av Aliumsitingini er tí ein vanlig fyrisitingarlig avgerð, sum stjórin sambært leiðslu-rættinum hevur rætt til at taka. Stjórin hevur grundað avgerðina um at flyta staðsetingina á saklig og viðkomandi atlit."  

stendir millum annað í niðurstøðuni hjá Uttanríkis- og Vinnumálaráðnum, sum er undirskrivað av Poul Michelsen, landsstýrismanni í vinumálum og Bjørgfríð Ludvig, táverandi aðalstjóra í Vinnumálaráðnum.