Føroyar frammanfyri Grønland

Tað stendur í árliga frágreiðingini um ríkisfelagsskapin hjá danska forsætisráðharranum, Lars Løkke Rasmussen.

Grønlendska kringvarpið, KNR, sigur, at sambært frágreiðingini er bruttotjóðarframleiðslan í Føroyum vaksin seks prosent um árið seinastu trý árini. Orsøkin er størri inntøkur hjá fiskivinnuni, og fólk brúka fleiri pengar. 

Í Grønlandi er vøksturin trý prosent.

Nýskipanir mugu gerast

Men forsætisráðharrin leggur afturat, at bæði Grønland og Føroyar noyðast at finna 750 mió. kr. til fíggjarlógirnar, skulu londini framvegis megna at geva fólkinum somu tænastur sum nú.

Og bæði londini noyðast at fremja stórar nýskipanir, sum eru neyðugar fyri at fáa avlop í fíggjarlógunum.

Munur á útbúgvingarstøðuni

Um arbeiðsmarknaðin verður sagt í frágreiðingini, at eisini har er støðan betri í Føroyum. Føroyingar hava hægri útbúgvingar, eisini útbúgvingar, sum kunnu brúkast í øðrum londum. 

Í Grønlandi fær bara annar hvør ungdómur sær útbúgving. Tað er lítið sammett við onnur heimsins lond.  

Grundlógararbeiði við treytum

Í frágreiðingini hjá forsætisráðharranum stendur eisini, at danska stjórnin stuðlar royndunum í Grønlandi og Føroyum at gera sjálvstøðugar stjórnarskipanir, - orðið forfatning verður brúkt, men bara, um tær eru innan fyri karmarnar hjá grundlógini.

Árligi ríkisfundurin millum løgmann, grønlendska landsstýrisformannin og danska forsætisráðharran verður í Grønlandi í morgin.