Eingin útbygging í Klaksvík

Tað verður ikki á hesum sinni, at tekniski skúli í Klaksvík verður útbygdur og fær tíðarhóskandi útgerð og amboð.

Løgtingið hevur felt uppskotið hjá Bjørn Kalsø í Sambandsflokkinum. 10 atkvøður vóru fyri og 12 ímóti.

Samgongumboðini í mentanarnevndini søgdu, at tá bygt verður út, og íløgur verða gjørdar í amboð og útgerð á miðnámsskúlaøkinum, eiga tær at verða raðfestar eftir einum heildarsjónarmiði, ið verður galdandi fyri ymsu útbúgvingarnar og ymsu økini í landinum.

Meirilutin segði seg hava álit á, at landsstýriskvinnan í sínum raðfestingum metir um tørvin á at útbyggja tekniska skúla og at útvega nýggj tól og amboð til skúlan.

Minnlutin í mentanarnevndini, - umboðini fyri andstøðuna, vísti m.a. á, at verkstøðini á tekniska skúla í Klaksvík ikki eru dagførd, síðani tey vórðu bygd seinast í 80-unum. 

Tí er neyðugt at geva skúlanum møguleika at útvega nyggjast amboðini, so næmingarnir verða kunnaðir um tær arbeiðsumstøður, sum eru á byggimarknaðinum nú, segði minnilutin í mentanarnevndini.