Minst 14 fólk latið lív í ódnarveðri

Tað er serliga í Mississippi, Tennessee og Arkansas, at ódnarveður gjørdi um seg tollaksmessudag, skriva útlendskir miðlar.

Millum tey deyðu var ein sjey ára gamal drongur, ið saman við familjuni koyrdi í bili, tá ein melduródn tók bilin, ið familjan koyrdi í. Higartil eru 20 melduródnir skrásettar í landsynningspartinum í USA.

Heldur ódnarveðrið í økinum fram, verður tað eisini tað hægsta talið av melduródnum, ið hava gjørt um seg í økinum í desember mánað, siga myndugleikarnir í Memphis.

Hitamet skrásett í New York

Nógv heim hava fingið skaða ella eru oyðiløgd av ringa veðrinum. Hildið verður, at umleið 70 milliónir fólk vóru stødd í økjum, sum vórðu rakt av ódnum tollaksmessudag, sambært sjónvarpsstøðini, ABC.

Minni flogfør vóru blást um koll á flogvallum, og fleiri motorvegir vórðu eisini stongdir í ringa veðrinum. Samstundis varð hitamet eisini sett í New York.

Í Central Park vórðu í gjár 22 hitastig mátað. Tað er eisini higartil heitasti dagurin, síðani almennu myndugleikarnir byrjaðu at skráseta upplýsingar um veðrið í 1871, skrivar tíðindastovan, AFP.