Einki álit fyri jól

Bíðað hevur í allan dag verið eftir, at Vinnunevndin hjá Løgtinginum skuldi koma við áliti sínum um veiðigjøld og uppboðssølu av fiskirættindum.

Nú er tó greitt, at einki álit kemur fyri jól, sum Aksel V. Johannessen, løgmaður, annars veitti vissu fyri í Degi og Viku.

Andstøðan hevur meirilutan í vinnunevndini, og hon hevur rætt at hava málið til viðgerðar í ein mánað.

Løgfrøðiligt upprit

Andstøðan í vinnunevndini sigur seg vilja hava greiðu á, um tað er løgfrøðiliga í lagi at selja fiskirættindi á uppboði áðrenn 2018.

Tí hevur hon biðið umsitingina hjá Løgtinginum skriva eitt upprit, sum greinar, um ein uppboðssøla kann enda við endurgjaldi frá reiðarum.

Sambært løgfrøðingum, sum umboða Reiðarafelagið, so kann ein uppboðssøla elva til, at landsstýrið verður stevnt eftir endurgjaldi.

Reiðarar meta seg eiga rættindi at fiska fram til 2018, og tí kunnu partar av hesum rættindum ikki seljast á uppboði. 

Fíggjarlóg millum jóla og nýggjárs

Tingið er farið í jólafrí, men kemur saman aftur 28. desember at viðgera fíggjarlógina fyri 2016.

Óvist er enn hvussu verður við inntøkunum frá ætlaðu uppboðssøluni, sum skuldi tryggja landskassanum eina inntøka á einar 50 mió. næsta ár.