Walisiska landsliðið millum 10 tey bestu

Styrkislistin hjá FIFA verður dagførdur hósdagin, men longu nú er greitt, at Wales er nummar 10 á komandi lista.

Walisiska landsliðið hevur verið í støðugari menning síðstu árini. Fyri fýra árum síðani var liðið styrkismett nummar 117 á FIFA-listanum. Á verandi lista er liðið styrkismett nummar 22, men kemur á dagførda styrkislistanum upp á tíggjunda pláss.

Wales hevur staðið seg sera væl í undankappingini til EM í Fraklandi næsta summar. Liðið er á odda í bólki-B við 14 stigum fyri seks dystir. Liðið hevur tí góðar møguleikar at spæla seg til sítt fyrsta endaspæl síðani HM í 1958.

Styrkislistin hjá FIFA, sum verður almannakunngjørdur hósdagin, sær soleiðis út:

1 Argentina 
2 Týskland
3 Belgia
4 Kolumbia
5 Holland
6 Brasil
7 Portugal 
8 Rumenia
9 England 
10 Wales

Lagt verður eisini til merkis avrikini hjá føroyska A-landsliðnum. Føroyar vera væntandi nummar 74 á nýggja styrkislistanum hjá FIFA. Hægsta styrkismetingin hjá landsliðnum higartil hevur verið nummar 102.