Nevningating byrjað: Ákærdi noktar seg sekan

<p>Hendiligt óhapp, sjálvverja ella dráp. Tað eru helst møguleikarnir í nevningatinginum, sum byrjaði í Føroya rætti í dag.</p>

<p>Ein 69 ára gamal maður er ákærdur fyri dráp, í øðrum lagi fyri vold við deyðanum sum fylgju, fyri ólógliga at hava komið sær inn í íbúðina hjá manninum.</p>

<p>Harumframt er maðurin ákærdur&nbsp;fyri at vera rýmdur av staðnum, hóast maðurin, ið doyði í Marknalíð, var í lívsvanda.</p>

<p><strong>Ósemja byrjaði leingi áðrenn deyðsfall</strong></p>

<p>Tosað varð um revsing frá nøkrum fáum árum, upp í lívlanga fongsulsrevsing. Verjin gjørdi alt fyri eitt greitt, at ákærdi maðurin noktar seg sekan í øllum ákærum.</p>

<p>Tað sum endaði við deyða í Marknalíð í november, byrjaði fleiri mánaðir frammanundan, tá tann deyði fekk aðra íbúðina í húsunum.</p>

<p>Ákærdi greiddi frá, at hann skuldi rinda leigu, og teir tosaðu enntá um, at tann deyði skuldi keypa aðra íbúðina í húsunum.</p>

<p><b>Avtala bleiv av ongum</b></p>

<p>Keypið av íbúðini gjørdist ongantíð veruleiki, og hann fekk heldur onga leigu. 20. november í fjør, segði tann ákærdi seg hava gjørt av, at maðurin skuldi úr íbúðini, tí hann skyldaði leigu fyri fleiri mánaðir.</p>

<p>Tá hann bankaði á dyrnar, varð ikki latið upp. Tí setti hann ein stiga upp á svalan, fyri at vita um hurðin úr køkinum út á svalan var opin.</p>

<p>Hurðin var opin, og komin innum, rópti hann á leigaran. Hann kom úr stovuni, tók í bringuna á honum, og bað hann fara á dyr.</p>

<p><strong>Ákærdi kendi seg hóttan</strong></p>

<p>Orð ókst av orði eina løtu, og teir fluttu seg til vaskið, har eigarin ætlaði at fáa sær ein vatnsopa, kom fram í Føroya rætti í dag.</p>

<p>Tá sá hann, at maðurin hevði tikið ein langan knív úr skuffuni, og hann hótti við knívinum, samstundis sum hann bað eigaran fara á dyr.</p>

<p>Ákærdi segði seg kenna seg hóttan, og hekk um armin á manninum, og slapp afturum hann. Teir tókust eitt bil, og duttu síðani niður á gólvið, tann deyð undir og ákærdi omaná.</p>

<p><strong>SÍ EISINI <a href="http://kvf.fo/netvarp/uv/2013/11/21/lgreglan-kannar-illgrunasamt-deysfal...øgreglan kannar illgrunasamt deyðsfall í Havn</a></strong></p>

<p>Hann reisti seg aftur, meðan tann deyði lá eitt bil, áðrenn hann fór at draga seg eftir gólvinum. Tástaðni sá hann blóð á gólvinum.</p>

<p>Ákærdi maðurin fór niðurundir í sína íbúð. Har var hann eina løtu, og fór síðani uppá aftur at hyggja. Tá lá hin maðurin stillur á gólvinum.</p>

<p><strong>Ringdi til fólk og boðaði frá</strong></p>

<p>Maðurin, ið er ákærdur, ringdi síðan&nbsp;til fólk, og segði frá, at støðan helst var álvarslig. Tvey fólk komu á staðið, og tá hann og ein ungur maður aftur fóru í íbúðina, merktu teir einki lív í tí deyða.</p>

<p>Tá bað ákærdi yngra manninin ringja til løgregluna. Hendingin fór fram millum kl. 21 og 23 í Marknalíð, kom fram í rættinum í dag.</p>

<p>Ákærdi maðurin var tikin og skuldsettur, og hevur sitið varðhaldsfongslaður síðani. Nevningatingið heldur fram í mikudagin, og tá skulu átta vitni avhoyrast.</p>