Flogfør og skip kanna nýggjar slóðir

<p>Leitingin eftir horvna MH370-flogfarinum hjá Malaysia Airlines, ið hvarv á túri frá Kuala Lumpur í Malaysia til Beijing í Kina 8. mars, verður nú víðkað.</p>

<p>Hetta hendir, eftir at eitt kinesiskt verjuskip hevur loftað signalum, ið kunnu stava frá sonevndu svørtu kassunum á flogfarinum, um tað liggur á havsins botni í Indiska Havinum.</p>

<p>Síðan í gjár, leygardagin, hava verjuskip í leitiøkinum loftað trimum signalum, ið kunnu stava frá horvna flogfarinum. Tvær ferðirnar í gjár, leygardagin, og aftur í morgun, sunnumorgunin.</p>

<p><strong>Tíðin um at renna út</strong></p>

<p>Battaríini í sonevndu svørtu kassunum halda umleið 30 dagar. Tískil seta myndugleikarnir nú alla orku inn at finna flogfarið, áðrenn tað verður ov seint at finna flogfarið við signalum frá svørtu kassunum.</p>

<p>- Tað er tó als ikki vist, at signalini stava frá MH370-flogfarinum hjá Malaysia Airlines, men vit mugu royna tað, vit kunnu, sigur ein talsmaður fyri myndugleikarnar, sambært tíðindastovuni AP.</p>

<p>Einki ítøkiligt er kortini funnið eftir horvna flogfarið, hóast leitað hevur verið í fýra vikur uttan íhald eftir horvna flogfarinum hjá Malaysia Airlines. 239 fólk vóru við flogfarinum, tá tað hvarv.</p>