Fáa 10 prosent í lønarhækking í trý ár

Verkfallið hjá sjúkrarøktarfrøðingunum er liðugt.

Tað vardi í seks vikur og ein dag.

Í gjárkvøldið tóku felagið og Fíggjarmálaráðið undir við einum semingsuppskoti frá Semingsstovninum.

Og Ruth Vang, landsstýriskvinna, og Óluva í Gong, forkvinna í Felagnum føroyskir sjúkrarøktarfrøðingar, skrivaðu undir semju um trý ára sáttmála, sum er galdandi til 31.desember 2025.

Felagið føroyskir sjúkrarøktarfrøðingar kunnger í morgun, at allir limir felagsins skulu møta til arbeiðis sum vanligt frá í morgun klokkan sjey.

Sløk 10 prosent í lønarhækking

- Hetta hava verið drúgvar, truplar og strævnar samráðingar, sigur Terje Sigurðsson. Men nú var tíðin búgvin, snøgt sagt, sigur hann.

Í lønartalvu, sum er galdandi frá 1.januar í ár, hækka øll lønarstig 3,80 prosent.

1.januar 2024 hækka øll lønarstig 4,04 prosent, og 1.januar 2025 hækka øll lønarstig 2,15 prosent.

Lønarhækkingin er 9,99 prosent.

Lønartalvan hevur 15 lønarstig. 5,50 prosent eru millum hvørt lønarstig. 

Les semjuna her.