Tiltøkini móti Russlandi verða sett í verk 7. september

Landsstýrismaðurin í uttanríkismálum ráðførdi seg í gjár við uttanlandsnevndina um revsitiltøkini, sum landsstýrið ætlar at seta í verk móti Russlandi.

Í uppskotinum um kunngerð, sum Kringvarpið hevur fingið, sæst, at uppskotið ítøkiliga snýr seg um at strika verandi undantak fyri russisk fiskiskip í 'kunngerðini um avmarkandi tiltøk í samband við atgerðir móti Ukraina', sum var lýst í fjør. 

Øll russisk skip eru tí í útgangsstøðinum bannað úr føroyskari havn. 

Undantøk eru kortini.

Eitt nú er forboðið ikki galdandi fyri fiskiskip, sum hava ørindi í føroyska havn, og sum fiska eftir fiskiveiðuavtaluni millum Føroyar og Russland. Og russisk skip, sum eru í neyð, ella hava tørv á hjálp, kunnu framvegis leggja at í Føroyum.

Høgni Hoydal

Høgni Hoydal, landsstýrismaður í uttanríkis- og vnnumálum.

Bunkra og proviantera

Landsstýrið kunngjørdi á tíðindafundi á Viðareiði 1. juni, at tiltøkini móti Russlandi fóru at verða herd, og tiltøkini, sum kunngerðin leggur upp til, er tað, sum landsstýrið lovaði.

Virksemið hjá russisku skipunum, sum sleppa til Føroya, verður tí avmarkað til at bunkra, proviantera, skifta manning og avskipa veiðu, sum er fiskað eftir avtaluni millum Russland og Føroyar. 

Russisk skip sleppa tí ikki at gera umvælingar og annað í Føroyum.

Sambært uppskotinum, kemur kunngerðin í gildi 7. juli, við virknaði frá 7. september.

Bjarni Hammer, formaður í uttanlandsnevndini, segði við útvarpið í gjárkvøldið, at nevndin fór at geva geva landsstýrismanninum skivligt svar í gjárkvøldið ella í dag. 

Bjarni Hammer

Bjarni Hammer formaður í uttanlandsnevndini. (Mynd: Bjarni Árting Rubeksen)