FMA 2023: "Gult myrkur" er ársins útgáva og ársins tekstur

Tað er í kvøld, at føroyski tónleikurin verður fagnaður, meðan bestu føroysku tónleika-avrikini verða heiðrað.

Í kvøld vann útgávan hjá Guðrið Hansdóttir, "Gult Myrkur", heiðurslønina fyri ársins útgávu. Harumframt vann "Gult myrkur" eisini heiðurslønina fyri ársins tekst. 

Ársins útgáva: "Gult Myrkur"

Ársins útgávu eigur songkvinnan, Guðrið Hansdóttir, sum eftir hondini er blivin ein av Føroya kendastu songkvinnum. 

Harumframt var "Gult myrkur" eisini ein av teimum útgávunum, sum Plátupanelið tók fram sum eina av ársins bestu útgávum, tá tónleikaárið 2022 var viðgjørt. 

Ársins tekstur: "Gult myrkur" 

Lív Maria Jæger Róadóttir

Caption: 

Lív Maria Róadóttir Jæger vann heiðurslønina fyri ársins tekst.

Sum eitt av fáu verkunum, sum vóru tilnevnd fleiri heiðurslønir, var "Gult myrkur" bæði í uppskoti til ársins útgávu og ársins tekst. Og "Gult myrkur" vann heiðurslønina í báðum bólkum.

Guðrið hevur sjálv gjørt øll løgini á útgávuni, burtursæð frá tøkulagnum "Appelsin", meðan Lív Maria Róadóttir Jæger, hevur skrivað allar tekstirnar.

Dómsnevndin skrivaði millum annað í sínari innstilling av verkinum, at talan er um ein tekstheim, sum støðugt flytur og flýtur á ymiskum mørkum, millum orð og løtur, sum renna undan, millum mótsetningar. Hesin tekstheimurin stendur sterkur saman við tónleikasamleikanum í heildarútgávuni, men hann krevur sítt pláss, trokar seg inn í hugaheimin hjá lurtaranum og festir røtur

Ein á, ein t-shirt og eitt súrepli hava broytt skap, eftir at mann hevur upplivað hetta verkið. Tað kemst av, at tað skaldsliga tilvitið er tilstaðar í verkinum: tekstirnir leggja seg eftir at fanga tann so hissini rótleysa málveruleikan hjá føroyingum í hesi samtíðini, ið annars ikki fær somu rúmd í skriftmálinum.