Jákup Petur súkklaði undan Kring Føroyar

Tað skuldi spurtur um mállinjuna til, men Jákup Petur Eliassen vann fimta og seinasta tein í Kring Føroyar-súkklukappingini.

Hann vann tískil allar fimm teinarnar og stóð ovast á sigurspallinum annað árið á rað. Hilmar Hansen endaði á 2. plássi - bæði sunnudagin og samanlagt - meðan Andrass Joensen varð nummar trý. 

Fimti teinurin var merktur av nógva mótvindinum úr Tjørnuvík og suður til Havnar, og ilt var hjá álopsfúsu súkklarunum at sleppa undan stóra bólkinum. 

Gunnar Dahl-Olsen hevði hug á 3. plássinum hjá Andrassi Joensen, men útbrot saman við Jákup Petur Eliassen og Hilmari Hansen eydnaðist ikki fyrrenn komið varð til Havnar, og tí gjørdist tíðarmunurin ov lítil.

Súsanna Skylv vann kappingina hjá kvinnum við góðari súkkling. Hon var einsamøll kvinna á onkrum av teinunum, men vísti sínar dygdir - serliga á einkultstartinum fyrsta dagin og á seinasta teinum, tá hon kom á mál hálvan annan minutt eftir vinnaran. 

Topp-fimm, menn:
1. Jákup Petur Eliassen: 8:30:30.6
2. Hilmar Hansen: 8:37:20.0 (+6:49.4)
3. Andrass Joensen: 8:41:52.3 (+11:21.7)
4. Gunnar Dahl-Olsen: 8:42:28.2 (+11:57.6)
5. Bogi Gregersen: 8:48:32.7 (+18:02.1)

Kvinnur: 
1. Súsanna Skylv: 9:11:06.5