KAF og Heilsuhjálparafelagið hava skrivað undir sáttmála

Heilsuhjálparafelagið og Kommunala arbeiðsgevarafelagið hava nú skrivað undir nýggjan sáttmála.

Talan er um ein eitt ára sáttmála, sum verður galdandi frá 1. oktober í fjør, til 1. oktober í ár.

Partarnir eru samdir um, at lønin hækkar 4,75 prosent, frá 1. oktober í fjør at rokna.

Í semjuni er eisini staðfest, at arbeiðstíð út yvir átta tímar um dagin verður samsýnt sum úrtíðarløn, sum er 50 prosent eyka av vanligu lønini.

Eisini hækka nakrar viðbøtur. Fyri summar- og frítíðarlegur verður løn latin sum fyri vanligan arbeiðsdag, tó í minsta lagi átta tímar. Haraftrat verður eykaviðbót latin, svarandi til kvøldviðbót fyri 16 tímar um samdøgrið. 

KAF og Heilsuhjálparafelagið og semja

Er talan um leygar-, sunnu- og halgidagar, verður latin tvífald viðbót. Men viðbøturnar verða einans latnar, um talan er um frammanundan avtalaða og avmarkaða tíð, sum verður brúkt til leguuppihald.

Í semjuni, sum báðir partar undirskrivaðu fyri løtu síðani, er einki nevnt um undantøk í samband við neyðtilbúgving í samband við verkfall.

Semingsuppskotið, sum varð lagt fyri partarnar í gjárkvøldið, var annars vrakað, tá partarnir hittust klokkan 11 fyrrapartin. Men semingsmaðurin valdi tó at halda fram við semingini, sum nú endaði við semju. 

Meiri verður at frætta í útvarpstíðindunum klokkan 15.