Lassin við í Champions League

Dómaraleiðarin hjá Fótbóltssambandi Føroya, Lassin Isaksen, hevur fingið stóra uppgávu frá UEFA. 

Evropeiska fótbóltssamgongan hevur útnevnt fyrrverandi dómaran at vera dómaraeygleiðara til dystin í Champions League-deildarspælinum millum AC Milan og Reyðu Stjørnu, skrivar Fótbóltssamband Føroya.

 - Hetta man vera ein av mínum størstu uppgávum sum dómaraeygleiðari. At sleppa at vera partur av einum dysti í deildarspælinum í Champions League kennist eisini sum eitt slag av viðurkenning. Men eg ætli mær ikki at gera mun á hesari uppgávuni, samanborið við aðrar eygleiðarauppgávur, ið eg havi havt fyri UEFA, sigur Lassin Isaksen við fsf.fo.

Seinastu nógvu árini hava Lassin Isaksen og Niklas á Líðarenda, umboðandi Føroyar, røkt fleiri dómaraeygleiðarauppgávur fyri UEFA. Alt frá kappingunum hjá UEFA fyri yngri aldursbólkar, innleiðandi umførunum í Champions League, bólkaspælið í Conference League og Europa League, umframt U21 og ymsar A-landsdystir.

Men nú komið er væl áleiðis í deildarspælinum í Champions League, sum fyrr var bólkaspælið, hevur UEFA útnevnt Lassin Isaksen at vera dómaraeygleiðara í dystinum millum italska stórfelagið, AC Milan, og Reyðu Stjørnu úr Serbia.

Undan dystinum er AC Milan nummar 16 í deildini við níggju stigum, meðan Reyða Stjørna er nummar 31 við trimum stigum.

Niklas á Líðarenda skal eisini í eldin seinni í mánaðinum, tá hann verður dómaraeygleiðari í dystinum í deildarspælinum í Conference League millum svenska liðið, Djurgården og Legia Warsawa úr Póllandi.