Aftur gos á Reykjanesi

Klokkan 20:23 í gjárkvøldið fór aftur at goysa á Reykjanesi - bert ein minutt eftir at íslendska veðurstovan boðaði frá, at vandi var fyri, at tað fór at goysa aftur.

Næstan einki fólk var í Grindavík í gjárkvøldið, men í Bláa lóni nærhendis vóru umleið 700 fólk, sum vórðu flutt burtur av myndugleikunum. Tað tók góðan hálvan tíma at fáa flutt øll fólkini burtur.

Hetta gosið minnir nógv um gosið, sum var 8. februar, men Magnús Tumi Guðmundsson, jarðalisfrøðingur, sigur við íslendska kringvarpið RÚV, at hetta er tað sterkasta av gosunum, sum hava verið á Reykjanesi í seinastuni.

Sprungan hesaferð er góðar 3,5 kilometrar long, og grótbræðingin rennur suðureftir móti Grindavík og vestureftir yvir Grindavíkarveg, eins og hon gjørdi 8. februar.

img_0593.jpg

Mynd: Laure de Montety

Tríggir vegir knýta Grindavík til restina av landinum. Grindavíkarvegur kann ikki brúkast, og vandi er eisini fyri, at grótbræðingin kann koma til Suðurstrandarvegin, sum orsakað av ótryggu umstøðunum eisini er stongdur fyri ferðslu. Triði vegurin til og úr Grindavík er Nesvegur, sum er tryggasti vegur til bygdina beint nú, men hann er í ringum standi frammanundan og tolir ikki tunga ferðslu. Og Nesvegurin hevur eisini fingið smærri skaðar av jarðskjálvtunum í umráðnum, so tað er ikki ósannlíkt, at tað als ikki verður koyrandi til Grindavíkar, skrivar RÚV.

Flogferðslan til og úr Keflavík er ikki ávirkað av hesum seinasta gosinum.

img_0588.jpg

Mynd: Laure de Montety