Hákun nærkast Champions League - meistarastríðið reyk hjá Eliasi

Hákun West av Teigum og felag hansara, Füchse Berlin, liggja framvegis væl fyri í stríðnum um týska meistaraheitið í hondbólti.

Høvuðsstaðarfelagið vann tepurt 32-31 á Flensburg, sum hevði Jóhan á Plógv Hansen á liðnum, og liggur fremst í Bundesliguni undir liðini á Magdeburg við 34 stigum.

Hans Lindberg situr tungt á vongplássinum hjá Füchse Berlin í landskappingardystunum, har Hákun West av Teigum ikki sleppur framat. Danin skeyt seks mál. Jóhan á Plógv Hansen skeyt tvey mál fyri Flensburg.

Nú eru seks stig ímillum Füchse Berlin á 2. plássi og Flensburg á 3. plássi, og tað tykist alt meira sannlíkt, at Hákun West av Teigum skal spæla í Champions League næsta kappingarár.

Kiel sett av í meistarastríðnum

Elias Ellefsen á Skipagøtu og THW Kiel høvdu vunnið sjey á rað undan heimadystinum ímóti Magdeburg mikukvøldið. 

Tað gekst kortini ikki eftir vild hjá føroyska spælskiparanum og liðfeløgunum, sum taptu 33-26 ímóti sterka oddaliðnum. Elias Ellefsen á Skipagøtu fekk fitt av spælitíð og skeyt tvey mál.

Kiel er á fimta plássi - heili átta stig aftanfyri Füchse Berlin og Magdeburg - og tí er ósannlíkt, at Kiel endurvinnur týska meistaraheitið.