Hægstirættur viðger mál um at ógilda lógina um uppboðssølu

26.februar skal Hægstirættur viðgera eitt føroyskt mál.

Tað er millum Reiðarafelagið og Fiskivinnu- og samferðslumálaráðið, sum ráðið eitur nú.

Reiðarafelagið vann í Føroya rætti, men landsstýrið vann í Landsrættinum.

Reiðarafelagið fekk loyvi at fara í Hægstarætt við málinum.

Stefan í Skorini

Stefan í Skorini er stjóri í Føroya Reiðarafelag. (Savnsmynd)

Skuldu ikki gjalda part av kvotunum

Tað var í lagi, tá landsstýrið í 2016 avgjørdi, at manningarnar ikki skuldu gjalda sín part av kvotunum, tá talan var um royndaruppboðssølur í 2016, segði Landsrætturin.

Eystari Landsrættur broytti í september 2022 dómin hjá Føroya Rætti, sum í januar í 2021 segði, at Fiskimálaráðið gjørdi seg inn á sáttmálan millum manningarfeløgini og reiðararnar, tá landsstýrið við lóg avgjørdi, at manningarnar ikki skuldu eiga lut í kostnaðinum.
  
Endurgjaldskravið hjá Reiðarafelagnum er slakar 18 mió.kr., men tað er bara fyri 2016. 

Kravið fyri 2017 verður ikki kunngjørt enn.

Parkerað fyribils

Endurgjaldskrøvini eru parkerað fyri fyrst, sigur Stefan í Skorini, stjóri í Reiðarafelagnum.

Fyrst skal Hægstirættur staðfesta, um landsstýrið hevur endurgjaldsskyldu.

Reiðarafelagið vil hava Hægstarætt at gera lógina um uppboðssølu ógilduga.

Brot á felagsfrælsi

Kjarnin í málinum er um brot á evropeiska mannarættindasáttmálan um felagsfrælsi. 

Reiðarafelagið var í Eystara landsrætti dømt at gjalda Fiskimálaráðnum 750.000 kr. í sakarkostnaði.

Um tríggjar vikur, mánadagin 26. februar, kemur málið so fyri í Hægstarætti.