Stendur á jøvnum í Fraklandi eftir fyrra valumfar

Tað stendur mestsum á jøvnum eftir tjóðartingsvalið í Fraklandi í gjár.

Franski forsetin, Emanuel Macron, og hansara mið-høgra samgonga, Ensamble, og vinstrasamgongan, Nupes, eru so at siga javnar eftir valið í gjár.

Mett verður, at Emmanuel Macron og samgonga hansara fáa millum 255 og 295 sessir. Tað skulu 289 sessir til at fáa meiriluta. Tískil er óvist, um Macron og samgonga hansara varðveita meirilutan.

Sambært einari forsøgn, eru bara 0,7 prosent á muni millum Ensamble og Nupes eftir valið í gjár, skrivar tíðindastovan, Ritzau.

Seinna umfar sunnudagin

Talið á atkvøðum í fyrra valumfari er ikki avgerandi fyri tjóðartingsvalið. Tað verður avgjørt sunnudagin, tá ið seinna valumfar verður.

Tær forsøgnirnar vísa, at samgongan hjá forsetanum vinnur tryggan meiriluta av teimum 577 sessunum í franska undirhúsinum.

Fyribils forsøgnin frá í gjár vísir eisini, at Marine Le Pen og flokkur hennara fáa 19,3 prosent av atkvøðunum, og at flokkurin fær 20-45 sessir.

Á forsetavalinum í Fraklandi, sum var í apríl, fekk Le Pen 42 prosent av atkvøðunum, Emmanuel Macron fekk 58 prosent.