Byggja nýggja flóttafólkalegu á Lesbos

Grikkaland fer at byggja eina nýggja legu á oynni, Lesbos, eftir at legan, Moria, brann í grund í farnu viku.

Tað sigur grikski forsætisráðharrin, Kyriakis Mitsotakis, sum samstundis mælir Evropa at vera við í ætlanini.

Tá flóttafólkakreppan tók seg upp í 2015 og í 2016, gjørdist Lesbos eitt savningarstað fyri flóttafólk og migrantar, sum vildu til Evropa.

Seinasta uppgerðin vísir, at 12.600 fólk búðu í leguni, hóast pláss bert er fyri 2.800 fólkum.

Vilja ikki hava flóttafólk

Neyðhjálparfelagsskapir hava fleiri ferðir funnist at umstøðunum í leguni.

Myndugleikarnir á Lesbos hava roynt at forða fyri, at ein nýggj lega verður gjørd, tí tey vilja ikki hava fólkini á oynni.

Mitsotakis sigur, at nýggja legan verður eitt dømi um ein nýggjan hátt at handfara migrantarnar.

- Vit fara at gera ætlanina til ein nýggjan møguleika, og eg vóni, at evropeisku londini fara at taka undir ætlanini, sigur hann.

Taka ímóti 400 børnum

11 evropeisk lond fara at taka ímóti 400 børnum í leguni, sum eru einsamøll, men Danmark er ikki millum tey londini. Í staðin hevur Danmark gjørt av at senda 22,4 milliónir kr. til økið, umframt neyðhjálp av ymsum slag.

Eina viku fyri, at eldurin kyknaði, varð legan stongd í tvær vikur, tí korona var farin at ganga í leguni.

Eftir eldin varð staðfest, at 35 fólk eru smittað við korona. ; Myndugleikarnir stúra fyri, at korona fer at breiða seg í økinum, tí migrantarnir liggja tætt saman, skrivar Reuters.