Øll kannað: Eingin smitta staðfest

Øll blivu kannað í gjár, tí ein í leiðarahópinum var fyrr í vikuni staðfestur at vera positivur. Tí bleiv allur hópurin kring Betri-liðið hjá felagnum kannaður í gjár.

Og eingin var positivur. Allur hópurin var í sjálvbodnum sóttarhaldi. B36 sigur, at felagið tosaði við landslæknan í gjárkvøldið.

 >> SÍ EISINI Besta liðið hjá B36 rakt av koronu

Niðurstøðan hjá landslæknanum var, at umstøðurnar kring koronutilburðin vóru av tílíkum slagi, at hópurin ikki er settur í sóttarhald.

Tað skrivar B36 á heimasíðuni. Felagið kann tí halda fram at fyrireika seg til Europa League dystin á Gibraltar í næstu viku.

Men spælararnir verða kannaðir aftur í morginári og mánadagin. Fyri at binda um heilan fingur verður tó eingin venjing, fyrr enn kanningarúrslitini koma í morgin.