Minni frá alingini meira frá fiskivinnuni

Alivinnan rindaði minni og fiskivinnan meira í landskassan í fjør, sambært frágreiðingini hjá Landsgrannskoðanini um munin millum játtan og frávik.

Loyvisgjald á alivinnu gav 23,6 milliónir krónur minni enn tær 160 milliónirnar, sum standa í fíggjarlógini.

Orsøkin er minni tøka enn mett, hevur Landsgrannskoðanin fingið at vita úr landsstýrinum.

Fiskivinnan rindaði meira enn mett.

Á kontuna avgjald á fiskatilfeingi komu 11,3 mió. kr. meira enn tær 292 milliónirnar, sum eru í fíggjarlógini.

Nógvir pengar frá fiskivinnuni

Orsøkin er rætt og slætt fleiri pengar enn mett frá avgjaldi og uppboðssølu.

Partafelagsskatturin gav minni enn mett í fjør.

Í fíggjarlógini eru 395 milliónir. Men inntøkan var minni enn tað, hon var 12,1 millión minni, tá kommunurnar høvdu fingið sín part.  

Teir nógvu bilarnir, sum nú eru í Føroyum, síggjast eisini aftur í inntøkunum hjá landskassanum.

Skrásetingargjaldið gav 21,2 milliónir meira og vegskatturin 6,5 milliónir meira enn mett í fjør.