Kvoturnar tær somu hóast nógv størri ráðgeving

Londini, sum eru í makrelsemjuni, eru samd um ikki at broyta kvoturnar í ár, sigur føroyski samráðingarleiðarin, Herluf Sigvaldsson.

Føroyar, Noreg og ES hittust í London hósdagin og fríggjadagin í síðstu viku at viðgera kvoturnar, nú ráðgevingin hjá ICES er broytt.

Grønland sendi eisini fólk á fundin, men tað gjørdu Ísland og Russland ikki, hóast tey vórðu boðin.    

ICES hevur meira enn tvífaldað sína ráðgeving um makrel í ár.

Dupult so stór

Fyrra ráðgevingin var, at ikki er ráðiligt at fiska meira enn 318.000 tons á okkara leiðum í ár.

Nú er ráðgevingin hjá ICES 770.000 tons.

Føroyar, ES og Noreg, sum eru samd um makrelbýtið, hava givið sær góð 650.000 tons í ár, hóast ráðgevingin hjá ICES tá var 318.000 tons.

Og tey 650.000 tonsini verða standandi eftir fundin í London.

Men tá hini londini, Grønland, Ísland og Russland, eru tald við, eru kvoturnar størri enn ráðgevingin hjá ICES er nú.

Makrelsemjan

Tey trý londini eru tó ikki við í makrelsemjuni, sum Føroyar, ES og Noreg gjørdu í London á Grækarismessu í 2014.

Tann semjan varð longd í fjør og er tí eisini galdandi fyri 2019 og 2020.

Í nógv ár hevur makrelveiðan verið nógv størri enn ICES hevur mælt til, so makrelur úr átta londum í landnyrðings-partinum av Atlansthavinum mistu MSC góðkenningina fyri fyrst í mars í ár.

Fáa kanska MSC aftur

Makrelur verður sambært MSC ikki fiskaður burðardygt og kann tí ikki fáa MSC stemplið longur.

Men nú kvoturnar ikki eru hækkaðar, er møguleiki fyri, at MSC góðkenningin fæst aftur, tí fiskað verður burðardygt. 

Føroyar, Noreg og ES vórðu eisini samd um at senda ICES umbøn um ráðgeving um nýggja umsitingarætlan fyri makrel, sigur Herluf Sigvaldsson.