Samráðingar um fiskirættindi halda fram í dag

Samráðingar millum íslendsk og føroysk embætisfólk um fiskirættindasáttmála fyri 2019 og rammuavtalu fyri fleiri ár eru í Havn í dag.

Eingin sáttmáli er fyri 2019. Londini hava havt samráðingar síðani í fjør heyst, men higartil uttan úrslit. Fyri jól kom fram, at íslendska stjórnin roknar ikki við fiskiskapi í føroyskum sjógvi í ár.

Íslendingar vilja broyta

Íslendingar hava fiskað svartkjaft og norðhavssild í føroyskum sjógvi. Íslendingar vilja broyta sáttmálan við Føroyar.

Tey halda seg lata ov nógv afturfyri at sleppa at fiska svartkjaft í føroyskum sjógvi. Føroyar fáa fimm prosent av íslendsku heildarkvotuni av lodnu, tó í mesta lagi 25.000 tons.

Føroyar fáa eisini 5.600 tons av botnfiski í íslendskum sjógvi. Tað heldur íslendska fiskimálaráðið er alt ov nógv at lata fyri, at íslendsk skip sleppa at fiska svartkjaft í føroyskum sjógvi.