Veiðigjald strikað

Veiðigjaldið, sum er tvær krónur fyri kiloið hjá uppsjóvarskipum og eina krónu fyri skip á landleiðini, er tikið av, tað sum eftir er av árinum. Tað samtykti løgtingið við aðru viðgerð í dag.

Uppskotið varð lagt fyri løgtingið 1. november og fær gildi frá tí, hóast tað ikki verður samtykt fyrr enn nú.

Andstøðan mælir frá

Andstøðan, sum hevur meirilutan í Vinnunevndini, tók undir við at flyta sildina og makrelin um ár, men mælti staðiliga frá at taka avreiðingargjaldið av, tí so langt er liðið á árið, at eingin meining er í tí. Og so hevur avreiðingargjaldið virkað til, at mestsum allur fiskurin er landaður í Føroyum.

Uppskotið frá meirilutanum í Vinnunevndini varð felt, meðan uppskotið frá Høgna Hoydal, landsstýrismanni, varð samtykt.

Høgni Hoydal, landsstýrismaður, legði uppskotið fram 1. november, tí serliga stórar nøgdir av sild vóru eftir at fiska og nakað av makreli.

Eftir uppskotinum skal eigari av fiskifari, tað sum er eftir av 2017, ikki rinda avreiðingaravgjald á 2 krónur fyri hvørt kilo í rundari vekt av makreli og norðhavssild, sum fiskifarið landar til virkingar ella frystingar uttanlands ella letur móttøkuskipi undir fremmandum flaggi til virkingar ella frystingar.

Harafturat skal eigari av fiskifari á føroysku landleiðunum ikki rinda avreiðingaravgjald á 1 krónur fyri hvørt kilo í rundari vekt av makreli og norðhavssild, sum fiskifarið landar til virkingar ella frystingar uttanlands ella letur móttøkuskipi undir fremmandum flaggi til virkingar ella frystingar.

Lagt verður upp til, at strikingin av avreiðingaravgjaldinum fær gildi frá framløgudegnum, sum var 1. november.