Bilbumba kravt eitt mannalív í Malta

Daphne Caruana Galizia lat lív í spreingingini, tá bilur hennara sprongdist í luftina.

Í bloggum sínum fanst hon hvassliga at myndugleikunum og duldum valdsharrunum, sum stýra í minsta landinum í Evropa.

Seinasta avdúking hennara var móti forsætisráðharranum í Malta, Joseph Muscat, og tveimum hjálparmonnum hansara. Teir tríggir menninir verða gjøgnum offshorefeløg settir í sambandi við sølu av maltesiskum passum og peningi frá stjórnini í Aserbadjan.

Enn hevur eingin tikið ábyrgd fyri atsóknini.

Førdømir atsóknina

Forsetin í Malta, Marie-Louise Coleiro Preca, heitir á fólk um at sissast. 

- Í hesi løtu, nú landið er skelkað av slíkum ondsinnaðum álopið, heiti eg á øll um at vanda sær um málið, og ikki døma nakram - men vísa samhuga, segði hon.

Í almennari fráboðan fordømir forsætisráðharrin, Joseph Muscat, barbariska álopið. Hann hevur heitt á løgregluna um at biðja um upplýsingar frá trygdartænastum úti í heimi fyri at finna tey, sum hava skipað fyri álopinum.

- Øll, sum kenna Caruana Galizia, vita, at hon var kritikari, bæði politiskt og persónligt, men eingin kann rættvísgera slíka óndsinnaða atsókn á nakran hátt, segði Muscat á tíðindafundi.

FBI til Malta

Muscat boðaði seinni parlamentinum frá, at fólk frá amerikonsku fregnartænastuni, FBI, eru á veg til Malta fyri at hjálpa við kanningararbeiðnum, eftir at hann hevði sent amerikonsku stjórnini áheita um hjálp.

Leiðarin fyri Nationalistaflokkinum, Adrian Delia, sum Caruana Galizia eisini hevur viðgjørt, sigur, at drápið hevur sambandi við hennara skriving. 

- Eitt politiskt morð varð framt í dag. Tað, sum hendi í dag, er ikki eitt vanligt dráp. Tað er avleiðing av totala rættarliga forfallinum, sum hevur verið seinastu árini.