Minningarhald í ES-tinginum fyri Helmut Kohl

Verandi og fyrrverandi ríkisleiðarar eru í dag í Strasbourg, har minningarhald er í ES tinginum fyri týska kanslaranum Helmut Kohl, ið andaðist herfyri. Jarðarferðin verður seinni í dag í týska býnum Speyer í landspartinum Rheinland-Pfalz.

Helmut Kohl var vesturtýskur stjórnarleiðari, tá Berlinmúrurin fall í 1989, og Vesturtýskland og Eysturtýskland vórðu sameind aftur eftir at hava verið hvør sín statur eftir at Týskland varð hersett og endi fekst á krígnum í Evropa í 1945.

Helmut Kohl verður heiðraður fyri sín lut í arbeiðinum fyri at sameina Evropa aftaná kríggið, og í ES parlamentinum fara týski kanslarin Angela Merkel, franski forsetin Emmanuel Macron og russiski forsætisráðharrin Dmitry Medvedev at halda røðu. Tað fara fyrrverandi amerikanski forsetin Bill Clinton og fyrrverandi spanski forsætisráðharrin,  Felipe González, eisini.

Minningarhaldið átti at verið í Berlin heldur sonurin

Tað er fyrstu ferð slíkt minningarhald er í ES tinginum, har ES flaggið var breitt út yvir kistuna við Helmut Kohl.

Tað er eftir ynski frá einkjuni, Maike Kohl-Richter, at Helmut Kohl ikki fær eina týska stats-jarðarferð. Men tað heldur sonur Helmut Kohl í fyrru giftu, Walter Kohl, at pápin átti at fingið.

Walter Kohl heldur, at minningarhaldið átti at verið í høvuðsstaðnum Berlin við Brandenburger Tor, har ein partur av múrinum millum Eystur- og Vesturtýskland stóð.

Í samrøðu við týska blaðið, Die Zeit, sigur Walter Kohl bart út um minningarhaldið í ES tinginum, at tað er óvirðiligt.