Minst 20 særd eftir bumbuspreinging

Eingin hevur átikið sær ábyrgdina fyri einari spreinging á einum sjúkrahúsi í teilendska høvuðsstaðnum á ársdegnum fyri hernaðarkvettið í 2014

Løgreglufólk í forhøllini á Phramongkutklao-sjúkrahúsinum í Bangkok, har ein bumba sprongdist og særdi minst 20 fólk

Mynd: AP

Johnsigurd Johannesen

Bjarni Mohr

22.05.2017 - 09:48

Í minsta lagi 20 fólk eru særd av eini bumbuspreinging á einum sjúkrahúsi í teilendska høvuðsstaðnum Bangkok. Tað upplýsir teilendska løgreglan.

Bumban brast á trý ára degnum fyri hernaðarkvettið í 2014. Eingin hevur átikið sær skyldina av spreingingini á sjúkrahúsinum, sum fyrst og fremst pensjóneraðir heryvirmenn nýta.

Greinin heldur fram niðanfyri

A bomb explosion at a hospital in Bangkok has injured 24 people, police in Thailand say https://t.co/EsuxJHC8Xx
— Sky News (@SkyNews) May 22, 2017

Ein talsmaður fyri stjórnina sigur, at 24 fólk eru særd. Battarí og leidningar eru funnin á staðnum, og hildið verður, at tey hava verið nýtt til at gera bumbuna.

Teiland hevur verið syndrað síðani hernaðarkvettið 22. mai í 2014. Fyri einari viku síðani brast ein bumba uttan fyri tjóðleikhúsið í Bangkok. Tvey fólk vórðu særd.