Borgarstjóralønin hjá Jógvani Skorheim hækkar

Borgarstjórin í Klaksvík fær nú góðar 52.000 krónur um mánaðin. Tað samtykti Klaksvíkar býráð á fundi hóskvøldið. 

Samsýningarnar hjá býráðslimunum hækka eisini, eftir at Húsa og Klaksvíkar kommunu løgdu saman á nýggjárinum, og býráðslimirnir fáa umleið 10.000 krónur um mánaðin.

Sambært kunngerðini um kommunustýrislimir verða lønir og samsýningar ásettar eftir fólkatalinum í kommununum.

37. lønarflokkur

Kunngerðin sigur, at borgarstjórar í kommunum, ið hava millum 1.500 og 4.999 íbúgvar, fáa løn, ið svarar til 37. lønarflokk í sáttmálanum millum Tænastumannafelagið og landið.

Tað svarar til umleið 47.800 krónur um mánaðin. Borgarstjórar í kommunum við millum 5.000 og 9.999 íbúgvum fáa løn sambært 38. lønarflokki, og knappar 52.000 túsund krónur um mánaðin.

Fólkatalið í Klaksvík fór upp um 5.000, tá Húsa kommuna og Klaksvíkar kommuna løgdu saman á nýggjárinum, og tí hevur Klaksvíkar býráð samtykt at hækka lønina hjá borgarstjóranum.

Annika best lønti borgarstjórin

Lønin hjá borgarstjóranum er hækkað við 4.000 krónum og samsýningin hjá býráðslimunum er hækkað við 3.000 krónum.

Best lønti borgarsstjóri í Føroyum er borgarstjórin í Havn, tí sambært kunngerðini um samsýning til kommunustýrislimir, so fáa borgarstjórar í kommunum, ið hava 10.000 íbúgvar ella fleiri, løn, ið svara til 39. lønarflokk hjá tænastumannafelagnum, og tað eru góðar 55.600 krónur um mánaðin.