Heryvirmaður hjá yvirgangsfelagsskapinum IS dripin

Tað hendi í einum luftálopið, sum amerikanska hernaðarsamgongan stóð á odda fyri, fríggjadagin, upplýsti talsmaður fyri amerikanska verjumálaraðið, Peter Cook, ígjár.

Avrættingar á sjónbandi

Waheeb var millum annað kendur fyri at hava avrættað tríggjar lastbilførarar á sumri 2013. 

IS steðgaði lastbilunum á veg til Sýria, og avhoyringin og avrættingini vóru filmaðar og seinni vístar á netinum sum ávaring til onnur.

Waheeb hevur eisini verið at sæð í fleiri sjónbandaupptøkum hjá IS í sambandi við avrættingar.

Dømdur til deyða

Amerikanskar herdeildir handtólkum hann í 2006, og trý ár seinni dømdi ein irakiskur dómstólur hann til deyðis fyri at hava verið limur í al-Keida.

Í 2012 var hann ein av 110 fangum, sum vórðu latnir leysir, tá IS leyp á fongslið í Tikrit, har serliga vandamiklir fangar vóru samlaðir.

Waheeb gjørdist eftir hetta ovasti leiðari fyri IS í Anbar-landspartinum har vestri í Irak, - við markið til Sýria.

IS veikari nú

Irakskir myndugleikar hava skuldsett Waheeb fyri at hava skipað fyri fleiri yvirgangsatsóknum í landinum seinastu árini, sigur talsmaðurin.

- Tað er vandamikið at vera leiðari fyri IS í Irak og Sýria í hesum døgum. Vit vilja leggja trýst á teir á so nógvum økjum sum møguligt, og tað hevur eydnast væl. Anbar-landsparturin er týdningarmikil fyri IS, - og at vit nú hava tikið hernaðarliga IS-leiðaran frá teimum, fer at raka teirra førleika at fremja atsóknir har, sigur Peter Cook, talsmaður fyri amerikanska verjumálaráðið.