Keypa yvirtímar fyri at fáa Sam lidnan

Strandferðslan hevur keypt eina viku við yvirtíðararbeiði fyri at fáa Sam lidnan eika viku fyrr, sigur Henrik Old, landsstýrismaður, í svari til Jónleif Johannesen, løgtingsmann.

Men hetta fer samanumtikið ikki at kosta Strandfaraskipum Landsins meira, sigur stjórin, Hilmar Eliasen.

Sam skal hava nýtt dekk. Tí fer hann á beding næsta mánadag. Og har verður Sam væntandi til 21. apríl.

Jósup røkir siglingina

Meðan Sam er á beding, fer Jósup at sigla millum Klaksvík og Syðradal. Men Ternan siglir við farmi tveir dagar um vikuna. Hesir báðir dagarnir eru ásettir í tøttum samstarvi við vinnuna í Kalsoynni, sigur Henrik Old.

Henrik Old sigur, at kanska fer at bera til at lata Ternuna sigla tríggjar dagar um vikuna á Kalsoyarleiðini og onkran eykatúr á páskum.

Jónleif Johannesen, løgtingmaður, er millum teirra, sum undrast á, at Jósup og ikki Ternan skal sigla á Kalsoyarleiðini.

SÍ EISINI Sam á beding

Strandfaraskip landsins hava svarað, at hóast 18 kilometrar av vegi eru millum fýra bygdir í Kalsoynni, vóru næstan líka nógvir bilar við Ternuni á Nólsoyarleiðini sum við Sam á Kalsoyarleiðini í mars og apríl í fjør.

Ein onnur frágreiðing er, sambært Strandferðsluni, at skip, sum sigla fast á einari leið, verða ikki flutt haðani, tá onnur skip fara á beding.

Einasta undantakið frá siðvenjuni er Sandoyarleiðin, tá ið Teistin skal í dokk. Tá er neyðugt er at brúka Ternuna á Sandoyarleiðini.