Lovaði ball fyri ferðapeningin - nú er hann valdur

"Verði eg valdur, merkir tað, at eg fái kr 55.000,- skattafríðar niður í lumman, fyri at lata meg flyta við Smyrli til og úr Tórshavn! Er hetta ikki praktfullt?"

Soleiðis segði Bjarni Hammer, valevni hjá Javnaðarflokkinum á Tvøroyri, á Facebook fýra dagar undan løgtingsvalinum í gjár. Hann varð valdur í løgtingið í gjár.

Nú kunnu tey, ið valdu hann til løgtingsvalið, so smátt byrja at gleða seg. Í øllum førum um hann ger av at halda lyftið, hann gav undan valinum.

Greinin heldur fram niðanfyri

Soleiðis skrivaði Bjarni Hammer á sínum Facebook-vanga fríggjadagin. Boðini vóru eisini fagnað á sosiala miðlinum dagarnar eftir, har hann heystaði nógvar tumlar og viðmerkingar.

- Eg vísi á skeivleikan (við ferðapeninginum, red.) og hetta er ein háttur at varpa ljós á hetta, segði Bjarni Hammer í svari til fólk á Facebook, ið spurdu, hví hann gjørdi tað.

Bjarni Hammer fekk 298 persónligar atkvøður á valinum í gjár. Koma allir veljararnir til jólaborðhaldið - og hann brúkar allan ferðapeningin - fær hvør veljari mat og drekka fyri 184 krónur á jólaborðhaldinum.

Tað hevur ikki eydnast okkum at fáa Bjarna Hammer at vátta, um hann ger álvara av at halda eitt stórt jólaborðhald fyri sínum veljarum, sum hann lovaði fýra dagar áðrenn løgtingsvalið.