Ógift hava 60 milliónir krónur meira enn gift

Tað fer at kosta landskassanum yvir 60 milliónir krónur um árið, skulu giftir fólkapensjónistar fáa líka nógv frá landinum sum fólkapensjónistar, sum ógiftir búgva saman. 

Tí stórur munur er á tí, sum gift fáa, og tí, sum tey, ið búgva saman ógift, fáa í fólkapensjón.

Munurin er 3.200 krónur um mánaðin.

Ikki broytt í bræði

Men hetta verður neyvan broytt í bræði, tí tað kostar landskassanum millum 55 og 65 milliónir um árið at geva giftum líka nógv sum ógiftum.

- Við verandi fíggjarkørmum havi eg ikki møguleika við stuttum skotbrái at gera slíka broyting, sigur Annika Olsen, landsstýriskvinna í almannamálum.

Hon hevur svarað fyrispurningi frá Kára P. Højgaard, løgtingsmanni. 

Hjún hava tilsamans 16.500 kr. um mánaðin, tá samhaldsfasti er taldur við. Fólk, sum ikki eru gift, hava 19.700 kr. um mánaðin. 

Annika Olsen og Kári P. Højgaard eru samd um, at hetta er ikki rætt.  Gift eiga at fáa tað sama sum ógift.

Yvir 60 milliónir 

Men hetta verður ikki broytt nú, tí, sum landsstýriskvinnan sigur í svarinum, ein broyting í pensjónslógini, sum ger, at giftir pensjónistar fáa somu pensjón sum sambúgvandi pensjónistar, kostar landskassanum leysliga mett okkurt um 55-65 mió. kr. um árið.

- Við verandi fíggjarkørmum havi eg ikki møguleika við stuttum skotbrái at gera slíka broyting, sigur Annika Olsen, landsstýriskvinna í almannamálum.

Hon leggur afturat, at neyðugt er at taka spurningin um hjúnastøðu upp í breiðari høpi, tí eisini aðra staðni í føroysku almannalóggávuna er spurningurin viðkomandi.