Almannaverkið vil hava minstamark av tænastum

Hvussu kunnu kommunurnar tryggja teimum eldru eitt minstamát av røkt, tá einki minstamark er ásett?

Almannaverkið setur spurningin, nú ætlanin er at leggja eldraøkið út til kommunurnar at umsita.

Uppskot til løgtingslóg um kommunalt samstarv um heimatænastu, eldrarøkt v.m. er í løtuni til viðgerðar í Trivnaðarnevndini, og Almannaverkið, sum hevur viðgjørt uppskotið, hevur atfinningar - m.a. um tey minstamátini av røkt, sum lógin leggur upp til, at tey eldru skulu fáa.

Í skrivi til løgtingið sigur Almannaverkið, at sagt verður, at karmarnir í lógaruppskotinum hava til endamáls at skapa ta neyðugu rættartrygdina hjá borgarunum við at tryggja teimum eitt minstamát av tænastum, sum kommunurnar hava skyldu at hava.

Ójavnt tænastustig

Hinvegin er avgjørt ikki at áseta nakað minstakrav fyri tænastustigið, og at kommunurnar sjálvar hava eftirlit við tænastum, bústøðum og tilboðum eftir lógini um heimatænastu, eldrarøkt við meira.

Tænastustigið kann tískil vera sera ymiskt frá kommunu til kommunu, og Almannaverkið ávarar um, at hetta kann elva til, at borgarar fara at flyta úr kommunalum økjum við lægri tænastustigi til kommunal øki, har tænastustigið er hægri.

Meira verður at frætta um ætlanina at leggja eldraøkið út til kommunurnar eftir Dag og Viku í kvøld, har Annika Olsen, landsstýriskvinna og Sirið Steenberg, limur í Trivnaðarnevndini, fara at kjakast. Beinta Løwe Jacobsen verður vertur í sendingini.