Nú verður føroyskt undirvísingartilfar talgilt

<p>Slitnar bøkur, skræddar síður og krutl frá nógvum undanfarnum næmingum í bókum kann skjótt verða søga innan skúlagátt í Føroyum.</p>

<p>Tá skúlaklokkurnar ringja inn eftir summarfrítíðina, kunnu 7. floks og miðnámsskúlanæmingar, í staðin fyri at lata bøkurnar upp, tendra telduna.</p>

<p>Nám arbeiðir í løtuni við eini verkætlan, ið hevur til endamáls, at alt undirvísingartilfar í føroysku skúlaskipanini verður talgilt, sum frálíður.</p>

<p><strong>Byrja við 7. flokkum og miðnámsskúlum</strong></p>

<p>Arbeiðið at talgilda alt undirvísingartilfar til allar skúlaflokkar í føroysku skúlaskipanini er drúgt. So drúgt, at tað ikki kann bjóðast øllum samstundis.</p>

<p>Tí verður eftir summarfrítíðina byrjað við sjeyndu flokkunum í fólkaskúlanum og við miðnámsskúlunum í Føroyum. Tey verða tey fyrstu, ið fáa talgilt undirvísingartilfar.</p>

<p><strong>SÍ EISINI <a href="http://kvf.fo/greinar/2014/03/08/her-er-nyggja-talgilda-undirvisingartil... er nýggja talgilda undirvísingartilfarið</a></strong></p>

<p>Sjeyndu flokkarnir fáa talgilt undirvísingartilfar í føroyskari søgu. Miðnámsskúlanæmingar hava longu fingið talgilt tilfar í enskum og eftir summarfrítíðina verður tað í føroyskum.</p>

<p><strong>Stjórin á Námi hómar stórar møguleikar</strong></p>

<p>Tað er ein risa avbjóðing, at talgilda alt undirvísingartilfarið innan føroyska skúlagátt, ið somuleiðis letur upp dyr, sum hevur stórar møguleikar við sær, heldur stjórin á Námi.</p>

<p>- Nú, tá tilfarið verður talgilt, kunnu vit gera tilfarið samvirkið, innseta livandi myndir og slóðir og næmingarnir kunnu fáa svar uppá uppgávur beinanvegin, sigur Magnus Tausen.</p>

<p>Harumframt verður tað lætt at dagføra undirvísingartilfarið. Tá Nám hevur gjørt neyðugar dagføringar í tilfarinum, sæst hetta eisini aftur hjá øllum næmingum.</p>

<p><strong>Útlendskar loysnir koma Námi til góðar</strong></p>

<p>Skipanir, ið Nám hevur fingið atgongd til, eru umfatandi og krevja nógva servitan, fígging og tíð. Tískil hevur Nám roynt samstarv við útlendskar veitarar.</p>

<p>- Tað verður eisini ein stór avbjóðing at flyta alt tað gamla tilfarið yvir á nýggju, talgildu pallarnar, har tilfarið skal liggja, sigur Magnus Tausen, stjóri á Námi.</p>

<p>- Í løtuni er ikki heilt greitt, hvussu vit gera til próvtøkurnar, men tað skulu vit so hava uppá pláss til ta tíð, ið er á sumri 2015, leggur stjórin á Námi afturat.</p>