Ferðsluvanlukka í Oyndarfirði kravt eitt mannalív

<p>Klokkan 9:52 leygarmorgunin fekk politistøðin í Havn fráboðan um eina ferðsluvanlukku í Oyndarfirði, sum higartil hevur kravt eitt mannalív.</p>

<p>Ein 22 ára gamal maður varð í morgun funnin deyður á sjónum við Rættargjógv, tá bjargingarfólk komu á staðið, har bilurin er farin útav vegnum.</p>

<p><strong>SÍ EISINI <a href="http://kvf.fo/netvarp/sv/2013/12/28/bilurasjogv">VIDEO: Óvissa um orsøk til ferðsluvanlukku</a></strong></p>

<p>Kavarar, ið vórðu boðsendir til vanlukkustaðið, hava funnið vrakið av bilinum inni í Rættargjógv, umleið hálvan kilometur áðrenn komið verður til bygdina (sí kortið.)</p>

<p><strong>Leita eftir 20 ára gomlum manni</strong></p>

<p>- Vit hava orsøk at halda, at ein 20 ára gamal maður eisini var í bilinum, tá bilurin fór útav vegnum í gjónna, sigur Kristian Dahl, vakthavandi á politistøðini í Havn.</p>

<p>Kristian Dahl vil ikki koma nærri inn á, hví løgreglan heldur, at tann 20 ára gamli maðurin eisini var í bilinum, tá ferðsluvanlukkan hendi.</p>

<p>Báðir menninir - hann sum er funnin deyður og hann, leitað verður eftir - eru ættaðir úr Oyndarfirði, verður upplýst av politistøðini í Havn.</p>

<p><strong>Umfatandi leiting á sjógvi og landi</strong></p>

<p>Umfatandi leiting er farin fram við Rættargjógv og økið við gjónna, síðani ferðsluvanlukkan varð fráboðað leygarmorgunin klokkan 9:52.</p>

<p>- Nú er farið at skýma og leitingin er steðgað fyri í dag. Leitingin verður tikin upp aftur sunnudagin, tá tað ljósnar, sigur vakthavandi á politistøðini í Havn, Kristian Dahl.</p>

<p>Kavarar hava allan dag leitað á sjónum. Harumframt hava&nbsp;bjargingartyrlan hjá Atlantic Airways og bjargingarfólk eisini leitað á sjógvi og landi eftir 20 ára gamla manninum.</p>