Útbúnir lærarar fáa ikki starv

Ein triðingur av læraranum, sum vórðu lidnir í summar, hevur enn ikki fingið starv. Tað skrivar Skúlablaðið.

Orsøkin er, at lærarastørvini eru fækkað síðani 2009, tí tímajáttanin til skúlarnar er lækkað, einstakir av smáu skúlunum eru niðurlagdir, og harafturat er næmingatalið í fólkaskúlanum lækkað við út við 400 næmingum síðani 2005.

Øll fáa ikki starv

Herálvur Jacobsen, formaður í Lærararfelagnum, sigur við blaðið, at tað er sjálvsagt, at um Læraraskúlin framhaldandi tekur um 30 lærararalesandi inn á hvørjum ári, so verður torført hjá øllum at at fáa starv eftir lokna útbúgving.

Hinvegin vísir hann á, at Læraraskúlin kann ikki liggja stillur við jøvnum millumbilum, og sum støðan er nú, átti at verið høvi at skipað fleiri eftir- og ískoytisútbúgving til lærarar.

Ið hvussu er áttu avvarðandi partar at kannað møguleikarnar, sigur Herálvur Jacobsen við Skúlablaðið.