Noreg og ES: Vit bjóðaðu Íslandi og Føroyum størri kvotu

<div>Noreg og ES siga seg harmast um, at einki spurdist burtur úr samráðingunum um býtið av makrelinum í ár.</div><div><br></div><div>- Hóast fimm samráðingarumfør um makrelbýtið fyri 2012, har Noreg og ES hava lagt fram trý uppskot til semju, er tað eitt stórt vónbrot, at hvørki Ísland ella Føroyar hava tikið virknan lut í at finna semju, siga Lisbeth Berg-Hansen, norskur fiskimálaráðharri, og Maria Damanaki, ES-nevndarlimur, í felags fráboðan eftir úrslitaleysa samráðingarumfarið í Reykjavík.</div><div><br></div><div>Tær vilja vera við, at hvørki Ísland ella Føroyar løgdu fram nakað uppskot, sum tók atlit at, hvar makrelurin svimur og søgulig rættindi, soleiðis sum gjørt hevur verið við undanfarin samráðingarumfør.&nbsp;</div><div><br></div><div>Noreg og ES vilja vera við, at tey bjóðaðu Íslandi og Føroyum ein munandi størri part, enn londini høvdu eftir upprunaliga býtinum. Eisini vildu Noreg og ES loyva íslendskum og føroyskum skipum at fiska ein stóran part av kvotuni í norskum og ES-sjógvi.&nbsp;</div><div><br></div><div>Eftir úrslitaleysu strandalandasamráðingarnar fara ES, Noreg, Ísland og Føroyar væntandi at áseta sær eginkvotu.&nbsp;</div><div><br></div><div>Jacob Vestergaard, landsstýrismaður í fiskivinnumálum, segði við útvarpið í gjárkvøldið, at føroyska eginkvotan neyvan verður minni enn í fjør, tað eru í minsta lagi 150.000 tons.&nbsp;</div><div><br></div><div><b>Skotar í øðini</b></div><div><br></div><div>Samstundis er skotska fiskivinnan í øðini inn á Ísland og Føroyar eftir úrslitaleysu makrelsamráðingarnar í Reykjavík.</div><div><br></div><div>-Vit fordøma Ísland fyri at bjóða strandalondunum til Reykjavíkar at samráðast, tá tey ikki vísa nakran veruligan vilja at finna semju, sigur Ian Gatt, stjóri fyri felagsskapin hjá skotsku uppsjóvarvinnuni, SPFA.</div><div><br></div><div>Ian Gatt spyr eisini, hvat Føroyar gjørdu á fundinum í Reykjavík, tá landið einki hevði at samráðast við, men bara situr tigandi og bíðar eftir, at tað slitnar, so landið kann áseta eginkvotu.</div><div><br></div><div>Stjórin í felagsskapinum hjá skotsku uppsjóvarvinnuni heitir tí á ES um at seta tiltøk í verk móti Íslandi og Føroyum, longu áðrenn makrelfiskiskapurin tekur seg upp í summar.</div><div><br></div><div>Ian Gatt heitir beinleiðis á skotska og bretska fiskimálaráðharran, Richard Lochhead og Richard Benyon, um at gera alt fyri at ávirka ES, soleiðis at tiltøk verða sett í verk móti Íslandi og Føroyum beinanvegin.</div><div><br></div><div>Í gjár segði írski tjóðartingslimurin, Pat the Cope Gallagher, sum ES-tingið hevur biðið um at fylgja málinum um at seta handilstiltøk í verk móti triðjalondum, ið sambært ES ikki fiska burðardygt, at málið má takast upp á komandi fundi í fiskivinnunevndini hjá ES.</div><div><br></div><div>Nevndin hittist 29. februar, og Pat the Cope Gallagher skal hava sagt, at hansara uppskot verður, at upprunaliga uppskotið um at boykotta makrel verður víðkað til at fevna um allan fisk og fiskavørur.</div><div><br></div><div style="font-family: Arial, Verdana; font-size: 10pt; font-style: normal; font-variant: normal; font-weight: normal; line-height: normal; "><br></div>