Verjusemja: Raðfesta tiltøk hjá NATO, sum ræða mótpartin

Føroyar, Grønland og Danmark hava gjørt avtalu um lutin hjá donsku verjuni í Norðuratlantshavi næstu tíggju árini, sigur Verjumálaráðið í tíðindaskrivi.

Í stuttum er semja um, at fólk, myndugleikar og virki í Føroyum og Grønlandi skulu hava gagn av tí, sum verjan ger í londunum og uttan um tey.

Semja er eisini um at styrkja verjuna í Norðuratlantshavi, millum annað skulu sjókaðalar tryggjast.

Og semja er um, at ráðharrin og landsstýrisfólkini hittast tríggjar ferðir um árið.

Danska stjórnin hevur mælt til at brúka 143 milliardir krónur til verju næstu tíggju árini.

Troels Lund Poulsen, Høgni Hoydal

Høgni Hoyda, landsstýrismaður í verjumálum, og virkandi verjumálaráðharrin, Troels Lund Poulsen. Semja er um, at ráðharrin og landsstýrisfólkini hittast tríggjar ferðir um árið. (Mynd: Bjarni Árting Rubeksen)

Hvussu pengarnar skulu býtast millum tey trý londini, vera samráðingar um í heyst.

Landsstýrið í Føroyum og danska stjórnin eru samd um at raðfesta tiltøk hjá NATO, sum ræða mótpartin, og tiltøk, sum gera váðan fyri óætlaðum vandum lítlan sum ongan.

Í tíðindaskrivinum takkar Høgni Hoydal, landsstýrismaður, Troels Lund Poulsen, virkandi verjumálaráðharra, fyri gott og uppbyggjandi samstarv.

Høgni Hoydal sigur seg vera væl nøgdan við verjusemjuna.

Les semjuna her